Takengon- wartagayo.com
Hasrin Z Bersah
Seber ko langit
Kin pongotmu kamipe macik
Segegik mujadi karu
Sebuku gere bejenta
Simen nge lauhmu mujaril
Mujadi arul wan ni pematang
Mujadi lut wan ni belang
Munaringen tene musali wan ingeten
Genap nge uwes siara
Enti ne sampe ara mukerna
Donya gerene sangup
Munimang lauh si gere berede
Seber ko bumi
Kin uwesmu mumenge singuk
Kayu bepantik rengang mujergut
Atu besebu timul pukekune
Gintes gerle mujadi gunah
Waih mugemboyah mungenali berawang
Gere bererah
Gere beisarat
Selalu mununung kuyu
Gelah mutetajurenmi gaehmu
Enti mai tanoh kin paongmu
Genap nge simunge
Enti jadin kami kin seteru
Seber ko ate
Damemi orom rembege
Pulihmi ko semangat
Rayami kire bahgie
Kadunen ku Si Sara
Wan do’a enti berede
Tatangen pumu
Tungkuken ulu
Buge sabe wan perala
Takengen, 30 Januari 2026