Hasrin Z Bersah
Takengon-wartagayo.com
Kayu rubu pelongohen
Daling kolak sesèrenen
Kati enti kin pemikiren
Ku kiri kuen gelah mungune
Nge ke sangup i tuhi uren
Poraki lao nge ke tehen
Enti renye kasè sege mugegiren
Kin tetahen tubuh rembege
Pemutus ni peri kunul teruken
Muregang tali wan pelangkahen
Kati enti kin kekunen
Tiro jeweben ari biak sudere
Nge ke sedie kin taon bepeden
Penetah tentu bage ni persuelen
Enti renye kasè bimeren
Mukurik ilangen netahi dewe
Juel murege beret i timangen
Suket ku arèpé mulebih mien
Kati enti kin kekeberen
Gelah mukepastien betul atau gere
Nge ke mera besiijinen
Sekire lebih besibaginen
Enti renye pora kurang besiuweten
Besituninen kona ku lebe
Munengkah gere luke beden
Mudere gere bise tulen
Kati enti kin salahen
Ku dengan serinen mulo i perse
Nge ke mubetih sana sibueten
Gere ke tiwel munuwet keputusen
Enti renye sergak wan peceraken
Mukemangbilaken gere berede
Takengen, 1 Mei 2024
