Hasrin Z Bersah
Takengon-Perempat ni nesu mulo terarap
Sana si ara bewenè i telgap
Kolak ni awah cara besekap
Olokdi perngap gere tekoa
Sana demu bewene i jojot
Si gere tengengal renye i dolot
Atan pumu gere nguk mokot
Ilih mudegot i dagu mupaya
Pora muserdah bidikdi i antak
Bewenè i perlon bier kaul kucak
Gere teréngon ike ara besempak
Munemah ceracak tingkup muropa
Gere nguk légéh orom si bibes
Jeroh betaso sigere nguk teles
Pora silep gaeh si beratè cules
Wan upuh ules kekire mungona
Gelah inget-inget enti sampè lalè
Ukenen mata enti galip penomè
Keras ni kuyu gere tentu badè
Mera lempusingpè munaos bencana
Takengen, 5 Juni 2024
