Takengon-wartagayo.com
Hasrin Z Bersah
Gerene teridah ku mata
I kenunulen gerené ara
Pucecengang punyenyata
Osop Ama ari penéngonen
Gerene ara simunalu
Tatang kirep ni pumu
Laing silemut lagu besisu
Mepat tentu sisawahen
Séré ni beden biasa sibesapih
Uwet kunul gere ne mugigih
Gerene murasa hék urum letih
Nomé besingkih kiser kuen
Muke pintu ni umah
I tete telas pegolah
Sawah ketentuen ari Allah
Berlaku turah pejanyinen
Mubayang mien kusedenge
Urum kumpu galak besene
Kaul rum kucak kenyeh menye
Gere berede kuwan tenumpiten
Kerut ni seliben ganti ni bengis
Enti kire macik ate ringis
Bijak ni peri gere mulepis
Gere murasa luis bise kubeden
Besilo béwénè taring bekas
Mupari tene wan kerpe mulewas
Kujangko nge jarak iatas
Do’a we silepas kukirimen
Wan ate ikhlas urum seber
Bierpe denem rinu gati berunger
Luh ari mata mejen munyeder
Semangat siteger renye mumulihen
