Hasrin Z Bersah
Takengon- waetagayo.com
Kin bubung gere ilen terubuh
Sigatine turuh wanni musim uren
Kekire lepas kin taon teduh
Rupen gere sunguh kin pelongohen
Kin suyen gere ilen nguk
Tairdi mulapuk ike i sesuken
Gere ter ging pora murantuk
Mera ku buruk renye pembeluhen
Kin tete gere ilen cacak
Renye muderak ike kin kenunulen
Gere tehen ike kase begerdak
Meradi muremak sekire mutamah beben
Kin rering gere ilen terolah
Murahdi murebah ike kin seserenen
Ike simen kase si singah
Renye mubelah meh belepingen
Kin tingkep gere ilen lepas
Kerna tangak atas turah pemanangen
Kusi lebih we sabe sitelas
Gere mera tapas kutuyuh penengonen
Ike kin pintu gere ilen tegep
Renye mulungkep ike tulaken
Gere mu pentas terang urum gelep
Tutup erep erep gere te patokken
Pinangan, 2025
