TAKENGON-wartagayo.com
Hasrin Z Bersah
Nge gati mewen wan tangkir
Oya kati gere ne mugegir wan bubung rata
Munyerlet gelah bepikir
Udah kin tekedir mupinah nyanya
Gere situlak kati makin tingir
Ikepe mukepir lues ilen donya
Becerak sabe munyempir
Naran mupesir jarak ari jema
Mokot nge sepuh i santir
Nge bau angir parin wan para
Menetdi bange turah bepangir
Ulu sibakir kati enti mumara
Nume wan wih aha munukir
Belangipe cir gere ne nyata
Mukesimpulen buet i ahir
Gere daleh tir kase orop ara
Luah nisintak orop manis ibibir
Ulah dememir wan tungul mumata
Mumarin bise nge lagu tungir
Tuyuh ni pepir munaos istana
Timang Gajah, 25 Juli 2021
