Hasrin Z Bersah
Takengon-Ike gere ne musurah kamar
Ongot bedatè tekala mukemar
Kotek besebu nge meh cemar
Gere kin tawar jeroh si delè
Bawar gerené museluk ku pingang
Trem alus numené gerantang
Laing kasar nge mu pantang
Dewe lintang si begeli atè
Beluh gah osop sue
Beretpé timangen gerené murege
Ikotpé tali gere ara mupunce
Gerené mu bere bangurpé raraè
Sediken liwet mepat simunalu
Gerené bibes simujamut pumu
Taón kunul gatinen terduru
Cerak mutentu jarang nge simumengè
Paong beriring gerené rami
Kusi beluh nge kekendiri
Gerené ara simunaloi
Kuso kuini seseréng bewenè
Remalan nge gatinen terkuduk
Gerené i arap ikepé sesuk
Sediken arapé kasè muserempuk
Gerené tungkuk lagu sibiasaè
Arapé buet gerené betempuh
Sekire batang èdang gere bepembubuh
Simubantu gerené sunguh
Ku bur ku paluh nge bedatè
Tekala timul mien masalah
Simunentong mepat sawah
Sibiasa sabè gaeh ku umah
Gerené teridah tuniné diriè
Upet caci wan ni sisu
Sebet karib tipak dagu
Telas ku atas si kin seteru
Asa mujalu buetè sabè
Ike biasa ku arè madu i suket
Ku neraca timang ni beret
Ike besilo bubunpé kin penyipet
Nge turah singket sidahpé naruè
Takengen, 16 Mei 2024
