Hasrin Z Bersah
Mejen konot mejen naru
Bierpe nge i eyat atawa betegu
I punce gere mera demu
Kenur gere mutentu wan tengah tegang
Mejen renah mejen atas
Tekala selap renye pumemengas
Cerak kemali gere mubatas
Bewene telas bier si serap ni pematang
Mejen kedik mejen muringut
Ujung ni awah lagu bepunyut
Gere tepenge laing sut samut
Bewene i gerjut orom mata ilang
Mejen jeroh mejen giging
Gere mepat murahdi umping
Pora-pora renye ilang kemiring
Ku paong beriring renye mugerantang
Mejen terang mejen gelep
Arape suluh tetap begedep
Wan porak lao gati musungkep
Olok bengkep ike nge lelang
Mejen lemut mejen teger
Ku sahan demu gumis i peputer
Gere teramaten gere ne mu seber
Pora kona siber renye mujungkang
Nosar, 30 Oktober 2025