Hasrin Z Bersah
Takengon- wartagayo.com
Ramadhan ulen keseberen
Ku kite insen simujeleni
Perintah nge sahih ku kite i sawahen
Firman ni Tuhen wan Al Qur’an oya nge pasti
Kite kaji keta kite titiren
Gere mehaten kase muarti
Ara tulu curak ni keseberen
Ike salah penyederen keta ku tiro tabi
Seber si pemulo seber wan ketaaten
Perintah ni Tuhen kite jeleni
Setun seger ku kite i perintahen
Nge kin kewajiben ku kite umet Islam ni
Wan suret Al Baqarah terang kite engon
I bilangen seratus lapan puluh tige oya nge resmi
I perintahen pasa ku kite si berimen
Ku kite i harapen buge takwa mi
Tarawih rum witir muiringen
Mubedape bilangen gere kin hali
Ulen Rahmat urum Ampunen
I bebasen mien ari rara ni neraka si ngeri
Sikedue seber munaringen buet kemaksieten
Jegei anggota beden enti bala bili
Bewene buet turah ikendalinen
Tair itaringen si nge i kowai
Cogah rum upet enti bueten
Jegei perceraken si gere muarti
Ku kiding rum pumu pe jeroh i manaten
Betape penengonen gelah i batasi
Renye i jaraken buet siharamen
Si larang Tuhen enti tungkahi
I terang lao lape i gingen
Ikepe gerahen minum oya si enti
Hawa nafsu turah i kendalinen
Enti i mulon buet si kemali
Buet gere ruh renye taringen
Enti i karaten jegei diri
Siketige seber munerime si nge itakdiren
Dele perbueten siturah mari
Sibiasae halal nge i haramen
Turah i gingen wan ulen pasani
Beta ku ataste nge kin ketentuen
Oya cobaen ari Ilahi Rabbi
Ara musibah berbage ujien
Turah kite ikhlasen enti i sesali
Gere i tiro gaehni kesukeren
Beta penderitaen gere kite rai
Ike pe munimpe ku tubuh beden
Osah Allah mi kekueten do’a gere mari mari
Oyale kire tikik kusawahen
Tulu keseberen ku kite mupari
Buge lepas kase kite bueten
Bersiingeten sesabi diri
Gere wan ulen pasa pelin arani keseberen
Turah kite bueten sabe wan muripni
Berdo’a kite murum murum ku Tuhen
Buge kuet imen kite i denieni
Pinangan, 9 Maret 2025
