Hasrin Z Bersah
Tilok nume turuh
Ujung ni jejari rupen bepembubuh
Taring bise wan beden tubuh
Cara berasuh wan ni usi
Galak temuni wan kerumung
Sikep lale dedemu i dayung
Gere mubekat gere kemung
Ulah tutu ni lusung ku rembege si lesi
Seteru kin sekutu
Damal wan sara kubu
Tair sawah sekire munalu
Betungu kegere i mai
Dengki mutaso wan ate
Khianat munuruh ni dëne
Bejege wan ni nome
Tetah tentu buete rupen wan janyi
Tengah melem renye bediang
Gelep i jadi kin terang
Merahi tungkelen sirengang
Ngenali luang silepas i ayoi
Lale gere i sesino
Nosah tene kelem porak lao
Puter jening mubalik pepilo
Ke gere beriro mulak ku diri
Ari atas turun ku tuyuh
Bergantian gere beteduh
Ari baur sawah ku paluh
Wan sara kerpuh turah musali
Takengen, 19 Oktober 2025