Hasrin Z Bersah
Takengon- wartagayo.com
Ike nge jangak
Ninget ke ulak
Taring cerak mujadi janyi
Bekas ni tapak
I elem-elemen mujejak
Masa rempak sara pepanyi
Musara nge peden
Remalan beriringen
Beret ringen gere kin hali
Mulo mudepet ni uren
Bidik mungenali pelongohen
Mugegiren si taring kendiri
Agih mulo pakat
Jeroh morom musapat
Doa selamat wan kenduri
Rapit gere jerkat
Luah si nge i amat
Musier ri manat kusi i pérahi
Sunguh tekala munanguk
Morom musara peluk
Meh sesuk si penampi
Pongot taring singuk
Beluh si kona pepiluk
Petungkuk geh si murai
Mutik kire kin uwah
Jerilep telas munyerlah
Kin tuah mubahgiemi
Jangko gerene sawah
Leno minter mutewah
Murebah bier i tupangi
Takengen, 2 September 2024
