Hasrin Z Bersah
Takengon-wartagayo.com
Becerak dum lomese
Murangke kekata olokdi pane
Siperine turah i penge
Bierpe bèwène nge pelin cogah
Laing sanahpe gere teramat
Isihpe mupari munaringen santat
Gere tepecayai sabe khianat
Si ara bekat mujadi ugah
Bejanyi sabe ingker
Mubeda buet orom siseder
Wan nge lempang meranen musier
Patah ejer gerene amanah
Pulelidem lemek-lemek bau
Sanahpe pakat peanguk-anguk ulu
Wan sara gelung unang sara kuru
Munaos seteru ke nge mupisah
Mulo belangkah musara niring
Orom-orom beluh gere taring maring
Tekala kunul mungenali rering
Munetah siding gerené sepapah
Gere terosah sesara buet
Gatinen lutus sabe munilet
Akal konot kekire singket
Mujadi tebiet gerene te ubah
Tekala i atas renye muniwit
Ketike i tuyuh gati munuwit
Remalan beriring mera munyegkelit
Galip munyepit galak mungunah
Sipet kotek i peralai
Wan ni tubuh nge kin usi
Meh tipak dagu si kuen kiri
Gadung maji mumaral kuah
Mubungei diri orom peri manis
Wan jema rami pucecengis
Besekutu orom blis
Sara garis munurut silsilah
Takengon, 24 Januari 2025
